ຍອດມູນຄ່າການຄ້າລະຫວ່າງຈີນກັບອາຊຽນ ສ້າງສະຖິຕິສູງສຸດ ເປັນຄັ້ງທຳ​ອິດ

11-08-2013-B-3-mekong column

ງານມະຫະກຳ ຈີນ-ອາຊຽນ ແລະ ການປະຊຸມສຸດຍອດວ່າດ້ວຍການ​ຄ້າ ແລະ ການລົງທຶນ ຈີນ - ອາຊຽນ ຄັ້ງທີ່ 10 ຈັດຂຶ້ນທີ່ເມືອງໜານໜິງ ເຂດປົກຄອງຕົນເອງຊົນເຜົ່າຈ້ວງ ກວາງສີ ສປ ຈີນ ລະຫວາງ ວັນທີ 3-6 ກັນຍາ 2013 ທຜານມາ

ທ່ານ ຫລີ່ ເຄີສຽງ ນາຍົກລັດຖະມົນຕີຈີນສະແດງຄວາມເຫັນຕໍ່ການລິ​ເລີ່​ມພັດທະນາເຂດການຄ້າເສລີ ຈີນ - ອາຊຽນໃຫ້ຍົກ​ລະດັບສູງຍິ່ງຂຶ້ນວ່າ “ ຈີນຈະພິຈາລະນາຂໍ້ຮຽກຮ້ອງຂອງປະເທດອາຊຽນກ່ອນ ສ້າງເງື່ອນໄຂທີ່ເປັນຜົນດີຫຼາຍຍິ່ງຂຶ້ນເພື່ອການພັດທະນາຂອງອາຊຽນ ດ້ານນັກວິຊາການ ເຈົ້າໜ້າທີ່ ແລະ ນັກທຸລະກິດຈີນ ແລະ ປະເທດອາຊຽນຕ່າງເຫັນວ່າ ການພັດທະນາເຂດການຄ້າເສລີ ຈີນ - ອາຊຽນຂຶ້ນສູ່ລະດັບສູງຍິ່ງຂຶ້ນ ຈະສົ່ງເ​ສີມການອຳນວຍປະ​ໂຫຍ​ດຕໍ່ທັງສອງຝ່າຍ ແລະ ຮ່ວມກັນພັດທະນາ

ສຳນັກຂ່າວຊິນຫົວ ລາຍງານວ່າ:​ ທ່ານ ເລ ເລືອງ ມິນຫ໌ (Le Luong Minh) ເລຂາທິການອາຊຽນ ລະບຸໃນພິທີເປີດງານມະຫະກຳຈີນ - ອາຊຽນຄັ້ງທີ່ 10 ທີ່ຈັດຂຶ້ນທີ່ເມືອງໜານໜິງ ເຂດປົກຄອງຕົນເອງຊົນເຜົ່າຈ້ວງກວ່າງຊີວ່າ ໃນ​ໄລຍະ 10 ປີທີ່ຜ່ານມາ ງານມະຫະກຳຈີນ - ອາຊຽນໄດ້ເປັນແຮງກະຕຸ້ນການພັດທະນາເຂດການຄ້າເສລີ ຈີນ - ອາຊຽນດ້ວຍຄວາມສຳ​ເລັດ ພາຍໃຕ້ຂອບແຫ່ງຄວາມສຳພັນແບບຮຸ້ນສ່ວນທາງຍຸດ​ທະ​ສາດຈີນ - ອາຊຽນ ທ່ານ ເລ ເລືອງ ມິນ ຈຶ່ງໄດ້ສະ​ເໜີ​ຂໍ້​ສະ​ເໜີ 3 ປະການ ໄດ້ແກ່ 1. ຄວນສົ່ງເສີມຄວາມຮ່ວມມື ຮ່ວມກັບບໍລິສັດພາກເອກກະຊົນພັດທະນາສິ່ງອຳນວຍຄວາມສະດວກພື້ນຖານຕາມຂໍ້ກຳໜົດທີ່ລະບຸໄວ້ໃນ “ແຜນການເຊື່ອມໂຍງເສັ້ນທາງຄົມມະນາຄົມຂອງອາຊຽນ”  2. ຄວນກະຕຸ້ນຄວາມຮ່ວມມືທາງເສດຖະກິດໃນອະນຸພາກພື້ນທີ່ຂ້າມດິນແດນ ຊຶ່ງສາມາດດຳເນີນການລະຫວ່າງເຂດກວ່າງຊີ ກັບ ​ແຂວງ ແລະ ເມືອງຂອງປະເທດສະມາຊິກຂອງອາຊຽນໄດ້ 3. ຄວນເຂົ້າຮ່ວມຂະບວນການເຈລະຈາຢ່າງແຂ່ງຂັນ ເພື່ອບັນລຸຂໍ້ຕົກລົງວ່າດ້ວຍຄວາມຮ່ວມມືທາງເສດຖະກິດຢ່າງຮອບດ້ານ ມີຄຸນນະພາບ ແລະ ເອື້ອປະໂຫຍດແກ່ກັນພາຍໃນກອບຄວາມຕົກລົງພັນທະມິດທາງການຄ້າລະດັບພາກພື້ນ (RCEP) ທີ່ເປັນກອບຄວາມຮ່ວມມືທາງເສດຖະກິດ​ລະຫວ່າງ 10 ປະເທດອາຊຽນ ຊຶ່ງຈະສ້າງໂອກາດທາງທຸລະກິດຢ່າງໃຫຍ່ຫຼວງໃຫ້ກັບທຸລະກິດຂອງອາຊຽນ ແລະ ຈີນອີກດ້ວຍ​

 ຂະນະທ ນາຍົກລັດຖະມົນຕີ ແຫງ ສປປ ລາວ ​ທ່ານ​ທອງ​ສິງ ທຳ​ມະ​ວົງ ໄດ້​ປະກອບ​ຄຳ​ຄິດ​ຄຳ​ເຫັນ ໂດຍ​ກ່າວ​ວ່າ: ​ໃນຫຼາຍປີຜ່ານມາ​ນີ້, ການ​ຮ່ວມ​ມື​ລະຫວ່າງ​ອາ​ຊຽນ-ຈີນ ​ໄດ້​ຮັບ​ໝາກຜົນ​ອັນ​ໃຫຍ່ຫຼວງ, ​ສອງ​ຝ່າຍ​ສາມາດ​ເພີ່ມ​ທະວີ​ການ​ຮ່ວມ​ມື​ກັນ​ຕື່ມ​ອີກ​ໃນ​ອະນາຄົດ.

ທ່ານ​ທອງ​ສິງ ທຳ​ມະ​ວົງ​ ​ໄດ້​ສະ​ເໜີ​ໃຫ້​ເພີ່ມ​ທະວີ​ການ​ຮ່ວມ​ມື​ສອງ​ຝ່າຍ​ຈາກ​ສາມ​ດ້ານ ຄື​ດັ່ງ​ນີ້:

ໜຶ່ງ, ຈີນແລະອາຊຽນເພີ່ມທະວີການຮ່ວມມືແລະພັດທະນາດ້ານການຄ້າ, ຊຸກຍູ້​ການຈັດຕັ້ງປະຕິບັດ​ເຂດ​ການ​ຄ້າ​ເສລີ​ຈີນ-ອາ​ຊຽນ​ໃຫ້​ໄດ້​ຮັບ​ໝາກຜົນ​ອັນ​ໃຫຍ່ຫຼວງກວ່າ​ເກົ່າ;

ສອງ, ສອງ​ຝ່າຍ​ເພີ່ມ​ທະວີ​ການ​ຮ່ວມ​ມື​ແລະ​ພັດທະນາ​ດ້ານ​ການ​ເຊື່ອມ​ໂຍງ​, ​ໂດຍ​ສະ​ເພາະ​ແມ່ນ​ການ​ຮ່ວມ​ມື​ດ້ານ​ການ​ກໍ່ສ້າງ​ພື້ນຖານ​ໂຄງ​ລ່າງ, ​ເພື່ອ​ສ້າງ​ສະພາບ​ແວດ​ລ້ອມ​ອັນ​ສະດວກ​​ໃຫ້​ແກ່​ບັນດາ​ປະ​ເທດ​ອາ​ຊຽນ​ແລະ​ຈີນ​ພ້ອມ ດ້ວຍປະຊາຊົນ​ຂອງ​ສອງ​ຝ່າຍ ​ໃນດ້ານ​ການ​ຄ້າ, ການ​ລົງທຶນ, ການທ່ອງທ່ຽວ ​ແລະ ການ​ໄປມາຫາສູ່​ກັນ.

ສາມ, ສອງ​ຝ່າຍ​ສາມາດ​ສະໜອງ​ການ​ຊ່ວຍ​ເຫຼືອດ້ານ​ການ​ພັດທະນາ​ຊັບພະຍາກອນ​ມະນຸດ​ໃນ​ຂົງ​ເຂດ​ຕ່າງໆ​ໃຫ້​ແກ່​ປະ​ເທດ​ທີ່​ຫາ​ກໍ່​ເຂົ້າຮ່ວມ​ເຂດ​ການ​ຄ້າ​ເສລີ​ອາ​ຊຽນ, ​ເພື່ອ​ຮັບປະກັນ​ການ​ສ້າງ​ສຳ​ເລັດ​ປະຊາ​ຄົມ​ເສດຖະກິດ​ອາ​ຊຽນ​ໃນ​ປີ 2015.

​ໃນ​ຂະນະ​ດຽວ​ກັນ, ທ່ານ​ທອງ​ສິງ​ ທຳ​ມະ​ວົງ ​ໄດ້​ສະ​ເໜີ​ວ່າ: ປັດຈຸບັນ​ນີ້, ປະ​ເທດລາວ​ໄດ້​ປະກາດ​ນະ​ໂຍບາຍ​ກ່ຽວ​ກັບ​ວິ​ສາ​ຫະກິດ​ຕ່າງປະ​ເທດ​ໄປ​ລົງທຶນ​ຢູ່​ປະ​ເທດ​ລາວ, ​ໃນ​ນັ້ນລວມທັງ "ກົດໝາຍ​ວ່າ​ດ້ວຍ​ການ​ສົ່ງ​ເສີມ​ການ​ລົງທຶນ"  ​ແລະ ກົດໝາຍ​ທີ່​ກ່ຽວຂ້ອງ​ອື່ນໆ​ອີກ, ​ເພື່ອສົ່ງ​ເສີມ​ໃຫ້ວິ​ສາ​ຫະກິດ​ຕ່າງປະ​ເທດ​​ເປີດ​ກວ້າງ​ການລົງທຶນ​ຢູ່​ປະ​ເທດ​ລາວ. ທ່ານ​​ໄດ້​ເຊື້ອ​ເຊີນ​ແລະຍິນ​ດີ​ຕ້ອນຮັບ​ນັກທຸລະ​ກິດ​ຈີນ​ແລະ​ບັນດາ​ປະ​ເທດ​ອາ​ຊຽນ​ໄປ​ສຳຫຼວດ, ຄົ້ນຄວ້າ​ຢູ່​ລາວ​ນັບ​ມື້​ນັບຫຼາຍຂຶ້ນ, ​ເພື່ອ​ສະ​ແຫວ​ງຫາ​ໂອກາດ​ການ​ລົງທຶນ​ຢູ່​ລາວ​ໃຫ້​ໄດ້ຫຼາຍຂຶ້ນ ກວ່າ​ເກົ່າ. ຕົວ​ເລກ​ຂໍ້​ມູນ​ສະຖິຕິ​ສະ​ແດງ​ໃຫ້​ເຫັນ​ວ່າ, ​ໃນ​ຊຸມ​ປີຜ່ານມາ​ນີ້, ​ໃນ​ບັນດາ​ປະ​ເທດ​ທີ່​ໄປ​ລົງທຶນ​ຢູ່​ລາວ, ຍອດ​ຈຳນວນ​ການ​ລົງທຶນ​ຢູ່​ລາວ​ຂອງຈີນ​ໄດ້​ຢູ່​ອັນ​ດັບ​ແຕ່​ທີ​ 1ຫາ​ທີ​ 3 ​ໂດຍ​ຕະຫຼອດ.

ລາວ​ໄດ້​ກຳນົດ​​ເອົາອຸດສາຫະກຳ​ແລະຂະ​ແໜງ​ການ​ລົງທຶນທີ່​ເປັນ​ບຸລິມະສິດ ຄື: ກາ​ນກໍ່ສ້າງ​ພື້ນຖານ​ໂຄງ​ລ່າງ, ກະສິກຳ, ອຸດສາຫະກຳ, ການທ່ອງທ່ຽວ, ພະລັງງານ ​ແລະ ບໍ່​ແຮ່ ​ແລະ​ອື່ນໆ, ​ເພື່ອ​ທຳ​ການ​ກະກຽມ​ເປັນ​ຢ່າງ​ດີ​ໃຫ້​ແກ່​ວິ​ສາ​ຫະກິດ​ຂອງ​ປະ​ເທດ​ຕ່າງໆ​ທີ່​ຫວັງ​ຢາກຈະ​ໄປ​ລົງທຶນ​ຢູ່​ລາວ.

ເມື່ອມໍ່ໆນີ້ ທ່ານ ສະວີ່ ໜິງໜິງ ຮອງເລຂາທິການປະຈຳຝ່າຢຈີນຂອງຄະນະ​ມົນຕີທຸລະກິດ ຈີນ - ອາຊຽນກ່າວວ່າ ຍອດມູນຄ່າການຄ້າລະຫວ່າງຈີນກັບອາຊຽນໃນປີ 2012 ສ້າງສະຖິຕິສູງສຸດອີກຄັ້ງ ທະລຸ 400.000 ລ້ານໂດລາ​ສະຫະລັດ ເປັນຄັ້ງທຳ​ອິດ ສະຖິຕິສະແດງໃຫ້ເຫັນວ່າ ຍອດມູນຄ່າການຄ້າລະຫວ່າງຈີນກັບອາຊຽນເພີ່ມຈາກ 54.767 ລ້ານໂດລາ​ສະຫະລັດ ໃນປີ 2002 ຂຶ້ນເປັນ 362.800 ລ້ານໂດລາສະຫະລັດ ໃນປີ 2011 ເຕີບໂຕຂຶ້ນ 5,6 ເທົ່າ ໂດຍມີອັດຕາເຕີບໂຕຫຼາຍກວ່າ 20% ປັດຈຸບັນ ຈີນກາຍເປັນຄູ່ຄ້າອັນດັບໜຶ່ງຂອງອາຊຽນ ແລະ ອາຊຽນກໍ່ແຊງໜ້າຍີ່ປຸ່ນຂຶ້ນມາເປັນຄູ່ຄ້າອັນດັບທີ່ 3 ຂອງຈີນ

ໃນ​ໄລຍະ 10 ປີມານີ້ ຄວາມຮ່ວມມືທາງເສດຖະກິດໃນພາກພື້ນໄດ້ຮັບການພັດທະນາດ້ວຍດີ ປະເທດຕ່າງໆ ມີຄວາມຮ່ວມມືໃນການພະຍາຍາມສ້າງໂອກາດທາງການຄ້າຫຼາຍຍິ່ງຂຶ້ນ ໂດຍເມື່ອປີ 2010 ເຂດການຄ້າເສລີ ຈີນ - ອາຊຽນ ຊຶ່ງເປັນເຂດການຄ້າເສລີໃຫຍ່ອັນດັບທີ່ 3 ຂອງໂລກໄດ້ກໍ່ຕັ້ງຂຶ້ນຢ່າງເປັນທາງການ ຈາກນັ້ນໄດ້ເລັ່ງກ້າວຈ​ົນລ້ຳໜ້າເຂດການຄ້າເສລີໃຫຍ່ໃນເຂດອື່ນໆ

ໃນປີຜ່ານໆມານີ້ ການຄ້າ ແລະການລົງທຶນໃນເຂດການຄ້າເສລີ ຈີນ - ອາຊຽນເຕີບ​ໃຫຍ່ຂຶ້ນຢ່າງວ່ອງ​​ໄວ ແລະ ໃນອະນາຄົດຍັງມີປະເດັນກ່ຽວກັບການພັດທະນາທີ່ໜ້າສົນໃຈດັ່ງ​ນີ້:

·         ປະເດັນ(ທີ່ໜຶ່ງ) ​ເຖິງປີ 2015 ຍອດການຄ້າແບບທະວິພາຄີຈະສູງ​ເຖິງ 500.000 ລ້ານໂດລາສະຫະລັດ

·         ປະເດັນ(ທີ່ສອງ) ການທຳ​ລາຍກຳແພງກີດກັນທີ່ນອກເໜືອລະບົບພາສີອາກອນ ຫຼຸດຕົ້ນທຶນການຄ້າ

·         ປະເດັນ(ທີ່ສາມ) ການຂະຫຍາ​ຍຂອບເຂດຄວາມຮ່ວມມືລະຫວ່າງສອງຝ່າຍໃຫ້ກວ້າງຂຶ້ນ

·         ປະເດັນ(ທີ່ສີ່) ການຫາລື​ກ່ຽວ​ກັບ ການຂະ​ຫຍາ​ຍບໍລິເວນຄອບຄຸມຂອງເຂດການຄ້າເສລີ ຈີນ - ອາຊຽນ

·         ປະເດັນ(ທີ່ຫ້າ) ການຫ້າມໃຫ້ປັດ​ໄຈທີ່ບໍ່​ແມ່ນເສດຖະກິດສົ່ງຜົນກະທົບຕໍ່ການພັດທະນາຂອງເຂດການຄ້າເສລີ

ຜູ້ນໍາຂອງອາຊຽນຕົກລົງຈະກຳໜົດເວລາຈັດຕັ້ງປະຊາຄົມເສດຖະກິດອາຊຽນ (AEC) ໃນວັນທີ 31 ທັນວາ ປີ 2015 ຜູ້ຊ່ຽວຊານ ແລະ ນັກວິຊາການຂອງຈີນ ແລະ ອາຊຽນຕ່າງສະແດງວ່າ ເມື່ອປະຊາຄົມເສດຖະກິດອາຊຽນ ຈັດຕັ້ງແລ້ວສຳ​ເລັດ ຈະເປັນການເສີມກັບເຂດການຄ້າເສລີ ຈີນ - ອາຊຽນ ແລະ ຂະຫຍາ​ຍຕະຫຼາດໃຫ້ກວ້າງຂຶ້ນ

ໃນປີທີ່​ຜ່ານ​ມານີ້ ຕົ້ນທຶນແຮງງານຂອງຈີນເພີ່ມສູງຂຶ້ນ ຈຶ່ງບັງຄັບໃຫ້ທຸລະກິດການຜະລິດຕ່າງໆ ລວມ​ເຖິງດ້ານເສື້ອຜ້າ ແລະ ​ເກ​ີບ ເປັນຕົ້ນ ຕ້ອງຍ້າຍໄປສູ່ອາຊີຕະ​ເວັນອອກສຽງໃຕ້ ປະເທດອາຊຽນບາງປະເທດກໍ່ເລີ່ມກາຍເປັນ “ໂຮງງານແປຮູບ” ແທນຈີນ

ແຕ່ຜູ້ຊ່ຽວຊານສ່ວນຫຼາຍເຫັນວ່າ ເລື່ອງແບບນີ້ອາດບໍ່​ແມ່ນເລື່ອງບໍ່ດີ ນັກເສດຖະສາດຈາກສູນວິ​ໄຈຍຸດ​ທະ​ສາດ​ລະຫວ່າງປະເທດອິນໂດ​ເນ​ເຊຍກ່າວວ່າ: ວິສາຫະກິດຈີນສາມາດຈັດຕັ້ງໂຮງງານຜະລິດສິນຄ້າ ຫຼື ສູນບໍລິການຄົນລະຊະນິດໃນປະເທດຕ່າງໆ ຕາມຄວາມໄດ້ປຽບຂອງແຕ່ລະປະເທດໃນອາຊຽນ ຜູ້ອຳນວຍການຫໍການຄ້າຈີນຂອງອິນໂດ​ເນ​ເຊຍຍົກຕົວຢ່າງວ່າ​: ວິສາຫະກິດຈີນສາມາດຈັດຕັ້ງໂຮງງານຜະລິດດ້ານອາຫານ ຫຼື ການກະ​ເສດ​ ແລະ ຕັ້ງໂຮງງານຜະລິດລົດໃນອິນໂດ​ເນ​ເຊຍ ສ່ວນສິນຄ້າທີ່ຜະລິດອອກມານັ້ນ ຍັງສາມາດຈຳໜ່າຍໃນຕະຫຼາດທັງອາຊຽນໄດ້ອີກດ້ວຍ

ໜັງສືພິມເຫີນ​ໝິນລຶເປົ້າ ລາຍງານວ່າ ປີນີ້ເປັນຄົບຮອບ 10 ປີທີ່ລົງນາມໃນຂໍ້ຕົກລົງວ່າດ້ວຍກອບຄວາມຮ່ວມມືດ້ານເສດຖະກິດ ຈີນ - ອາຊຽນ ແລະ ກໍ່ເປັນການຄົບຮອບ 10 ປີການເປິດເຂດການຄ້າເສລີ ຈີນ - ອາຊຽນ ຖ້າວັດຕາມຍອດຈີດີພີ ເຂດການຄ້າເສລີ ຈີນ - ອາຊຽນເປັນເຂດການຄ້າເສລີອັນດັບທີ່ 3 ຂອງໂລກ ແຕ່ຖ້າຫາກວັດຕາມຂະໜາດຕະຫຼາດ ນັບວ່າເປັນເຂດການຄ້າເສລີທີ່ມີຂະໜາດໃຫຍ່ທີ່ສຸດຂອງໂລກ

ນະໂຍບາຍວ່າດ້ວຍການຫຼຸດ ຫຼື ຍົກເວັ້ນພາສີການຄ້າໃນຂະບວນການສ້າງເຂດການຄ້າເສລີ ຈີນ - ອາຊຽນຈົນແລ້ວສຳ​ເລັດໃນປັດຈຸບັນ ​ເຮັດໃຫ້ການສົ່ງອອກສິນຄ້າຈາກປະເທດອາຊຽນມາຈີນເຕີບ​ໃຫຍ່ຢ່າງໝັ້ນຄົງ ຍອດການສົ່ງອອກຈາກຈີນໄປຫາອາຊຽນກໍ່ເພີ່ມຂຶ້ນເລື​້ອຍໆ

ປະເດັນຫລັກໃນບົດ: “ຍອດມູນຄ່າການຄ້າລະຫວ່າງຈີນກັບອາຊຽນໃນປີ 2012 ສ້າງສະຖິຕິສູງສຸດອີກຄັ້ງ ທະລຸ 400.000 ລ້ານໂດລາ​ສະຫະລັດ ເປັນຄັ້ງທຳ​ອິດ ສະຖິຕິສະແດງໃຫ້ເຫັນວ່າ ຍອດມູນຄ່າການຄ້າລະຫວ່າງຈີນກັບອາຊຽນເພີ່ມຈາກ 54.767 ລ້ານໂດລາ​ສະຫະລັດ ໃນປີ 2002 ຂຶ້ນເປັນ 362.800 ລ້ານໂດລາສະຫະລັດ ໃນປີ 2011 ເຕີບໂຕຂຶ້ນ 5,6 ເທົ່າ ໂດຍມີອັດຕາເຕີບໂຕຫຼາຍກວ່າ 20% ປັດຈຸບັນ ຈີນກາຍເປັນຄູ່ຄ້າອັນດັບໜຶ່ງຂອງອາຊຽນ ແລະ ອາຊຽນກໍ່ແຊງໜ້າຍີ່ປຸ່ນຂຶ້ນມາເປັນຄູ່ຄ້າອັນດັບທີ່ 3 ຂອງຈີນ”