ດຣ.ພັນປະດິດ ພັນດາລາ. 12-04-2013-B-3-mekong column
ຖ້າທ່ານຜູ້ອ່ານທີ່ຕິດຕາມ ຄໍລຳແມ່ຂອງທີ່ຂ້າພະເຈົ້າຮຽນຮັບໃຊ້ ທ່ານຜູ້ອ່ານ ໃນສຸກທີ່ແລ້ວ ທ່ານຈະເຂົ້າໃຈໄດ້ຄວາມໝາຍ ຄວາມສຳຄັນຂອງໄມ້ດອກໄມ້ປະດັບ ພ້ອມທັງເຫັນໄດ້ ເຖິງຕົວເລກມູນຄ່າການນຳເຂົ້າທີ່ເປັນຈຳນວນຫຼາຍຕື້ກີບຕໍ່ເດືອນ
ເຊິ່ງການນຳເຂົ້າສ່ວນໃຫຍ່ ແມ່ນມາຈາກ ສປ ຈີນ ແລະ ໄທ,
ສ່ວນໜຶ່ງແມ່ນການຜະລິດພາຍໃນ ແລະ ນຳເຂົ້າ ຈາກ ສສ ຫວຽດນາມ
ຈະເຫັນໄດ້ວ່າ ທັງໄລຍະທາງການຂົນສົ່ງ,ການສີ້ນເປືອງໃນການເກັບຮັກສາ ແລະ ຄຸນນະພາບຂອງໄມ້ດອກ ທີ່ມາສູ່ຕະຫຼາດ ຫຼື ມາເຖິງມືຜູ້ຊົມໄຊ້ ກໍ່ຈະຫຼຸດລົງຕາມໄລຍະທາງ ແລະ ເວລາໃນການຂົນສົ່ງ ລວມທັງປັດໃຈຕົ້ນທຶນການຜະລິດ ທີ່ບວກຄ່າຂົນສົ່ງທີ່ນັບມື້ ນັບເພີ່ມຂື້ນ ສະນັ້ນ,
ການຜະລິດໄມ້ດອກໄມ້ປະດັບ ພາຍໃນປະເທດ ຈຶ່ງເປັນທັງຂໍ້ສະດວກ ແລະ ທ່າແຮງຫຼາຍກ່ວາ ເຊິ່ງຄວາມເໝາະສົມຂອງສະພາບພື້ນທີ່ການຜະລິດ ກໍ່ແຕກຕ່າງຂື້ນກັບປະເພດ ຫຼື ຊະນິດພືດ
ເປັນຕົ້ນໄມ້ປະດັບເຂດຮ້ອນ, ໄມ້ປະດັບປະເພດປູກກາງແຈ້ງ ກໍ່ສາມາດປູກໄດ້ດີໃນເຂດທົ່ງພຽງພາກກາງ ແລະ ພາກໄຕ້ ນັບແຕ່ນະຄອນຫຼວງລົງໄປຈົນເຖິງແຂວງອັດຕະປື ສ່ວນໄມ້ຕັດດອກເຂດໜາວ ຫຼື ອາກາດຊຸ່ມເຢັນ ກໍ່ເໝາະສົມປູກໄດ້ຫຼາຍພື້ນທີ່ໃນປະເທດເປັນຕົ້ນ ບັນດາພູດອຍ ເຂດພາກກາງ-ພາກເໜືອ ແລະ ເຂດພູພຽງບໍລິເວນ ພາກໄຕ້ ເຊິ່ງມາເຖິງປັດຈຸບັນ ການຄົມມະນາຄົມໄປມາກໍ່ສະດວກ ກ່ວາເມື່ອກ່ອນຫຼາຍ.
ເຊິ່ງສະບັບນີ້ ຂ້າພະເຈົ້າຈະຂໍອະນຸຍາດຂຽນແບບລວມໆ
ເຖິງປັດໃຈການຈະເລີນເຕີບໂຕ ຂອງໄມ້ດອກໄມ້ປະດັບ ແລະ ຈະຂໍລົງເລິກເປັນຊະນິດພືດ,ເຖິງປັດໃຈການຈະເລີນເຕີບໂຕ, ບາງເຕັກນິກໃນການຜະລິດ ຄຸນສົມບັດທາງພຶກສາສາດ,ຄວາມຕ້ອງການຂອງພູມມິອາກາດ ແລະ ລາຍລະອຽດອື່ນໆ.. ຂອງແຕ່ລະພືດທີ່ມີຄວາມນິຍົມໃນບ້ານເຮົາ ໃນອາທິດຕໍ່ໆໄປ.
ປັດໃຈທີ່ມີຜົນຕໍ່ການຈະເລີນເຕີບໂຕ ຂອງໄມ້ດອກໄມ້ປະດັບ ມີຄື: 1). ດິນເປັນປັດໃຈທີ່ສຳຄັນທຳອິດ ເພາະດິນເປັນທີ່ປູກ ດິນຕ້ອງມີຄຸນສົມບັດໃນການຍຶດຕິດ ແລະ ຄ້ຳຢັນລຳຕົ້ນ ເປັນບ່ອນໃຫ້ນ້ຳ, ທາດອາຫານຕ່າງໆແກ່ພືດ ຕະຫຼອດຮອດການຖ່າຍເທອາກາດໃນດິນ ແລະ ງ່າຍຕໍ່ການຊອນໄຊ ຫຼື ຂະຫຍາຍໂຕຂອງຮາກພືດ ດິນທີ່ອຸດົມສົມບູນ ພືດ ກໍ່ຈະເລີນເຕີບໂຕໄດ້ດີ; 2). ຄວາມຊຸ່ມຊື່ນ ຫຼື ນ້ຳ ໝາຍເຖິງຄວາມຊຸ່ມຊື່ນທີ່ຢູ່ໃນດິນ ແລະ ຄວາມຊຸ່ມຊື່ນທີ່ຢູ່ໃນອາກາດ ດິນທີ່ອຸດົມສົມບູນ ແລະ ມີທາດອາຫານຫຼາຍພຽງໃດກໍ່ຕາມ ຖ້າຂາດນ້ຳ ຮາກພືດ ກໍ່ບໍ່ສາມາດດູດທາດອາຫານດັ່ງກ່າວໄປໃຊ້ໄດ້ ສ່ວນຄວາມຊຸ່ມຊື່ນໃນອາກາດ ຖ້າເວົ້າໃຫ້ເຂົ້າໃຈງ່າຍ ແມ່ນມີຄວາມຈຳເປັນເພາະຊ່ວຍໃຫ້ຕົ້ນໄມ້ສົດຊື່ນຢູ່ສະເໝີ ຫຼື ຈະເວົ້າໃຫ້ລະອຽດຕື່ມໜ້ອຍໜຶ່ງແມ່ນ ຄວາມຊຸ່ມຂອງອາກາດ ມີຜົນຕໍ່ການເປີດປິດ ຂອງປາກໃບ, ການຫາຍໃຈຂອງພືດ ສົ່ງຜົນຕໍ່ການຄາຍນ້ຳຂອງໃບ ເຊິ່ງຈະມີຜົນຕໍ່ເນື່ອງເຖິງການດູດນ້ຳ ແລະ ທາດອາຫານຂອງຮາກພືດ, ການໃຫ້ນ້ຳ ແກ່ພືດ ກໍ່ເປັນສິ່ງທີ່ສຳຄັນຫຼາຍ ເພາະການໃຫ້ນ້ຳ ຫຼາຍເກີນໄປ, ໜ້ອຍເກີນໄປ ຫຼື ໃຫ້ບໍ່ຖືກວິທີ ຈະສົ່ງຜົນກະທົບຕໍ່ການຈະເລີນເຕີບໂຕຂອງພືດທັນທີ ເຊິ່ງການໃຫ້ນ້ຳ ຕ້ອງຄຳນຶງເຖິງ ຊະນິດຂອງພືດ, ສະພາບຂອງດິນ ແລະ ສະພາບແວດລ້ອມ ເປັນຕົ້ນ: ປູກບ່ອນຮົ່ມ ຫຼືກາງແຈ້ງ
ແລະ ອື່ນໆ… ຖ້າໃຫ້ນ້ຳບໍ່ພໍ ພືດຈະຫ່ຽວ
ແຫ້ງເວລາແດດຈັດ ລະຫວ່າງທ່ຽງວັນ ເພາະຊ່ວງດັ່ງກ່າວອາກາດຮ້ອນຈັດ ພືດຈະຄາຍນ້ຳຫຼາຍ ຖ້າຮາກດູດນ້ຳໄປຊົດເຊີຍບໍ່ພໍຈະເຮັດໃຫ້ພືດຫ່ຽວແຫ້ງ ແຕ່ກົງກັນຂ້າມ ຖ້າຫົດນ້ຳຫຼາຍ ຈົນນ້ຳຖ້ວມຂັງ ນ້ຳຈະໄລ່ອາກາດອອກຈາກຊ່ອງວ່າງໃນດິນ ເຮັດໃຫ້ດິນອີ່ມໂຕ ກໍ່ບໍ່ເໝາະສົມຕໍ່ການຈະເລີນເຕີບໂຕຂອງພືດເຊັ່ນກັນ ເພາະຈະເຮັດໃຫ້ຮາກພືດຂາດອົກຊີ ເຊິ່ງເປັນສິ່ງຈຳເປັນໃນການຫາຍໃຈ ຖ້າພືດຖືກນ້ຳຂັງ ສອງ ຫາ ສາມ ວັນ ພືດກໍ່ສາມາດຫ່ຽວແຫ້ງ ແລະ ຕາຍໄດ້ຄືກັບກໍລະນີຂາດນ້ຳ; 3). ແສງສະຫວ່າງ ມີບົດບາດສຳຄັນຕໍ່ການຈະເລີນເຕີບໂຕຂອງພືດ ນັບຕັ້ງແຕ່ເມັດເລີ່ມງອກ, ການສ້າງຮໍໂມນໃນພືດ, ການສ້າງເມັດສີ, ການສັງເຄາະແສງເພື່ອສ້າງອາຫານໃຫ້ແກ່ພືດ ຕະຫຼອດຮອດການອອກດອກ, ອອກໝາກ ແລະ ອື່ນໆ ເຊິ່ງພືດບາງຊະນິດຈະອອກດອກກໍ່ຕໍ່ເມືອໄດ້ຮັບແສງສະຫວ່າງພຽງພໍ ກົງກັນຂ້າມ ພືດບາງຊະນິດ
ຈະບໍ່ອອກດອກ ຖ້າໄດ້ຮັບແສງຫຼາຍກ່ວາທີ່ຕົນເອງຕ້ອງການ (ພືດວັນສັ້ນ ແລະ ພືດວັນຍາວ); 4). ອຸນນະພູມ
ເປັນປັດໃຈທີ່ສຳຄັນອີກຢ່າງໜຶ່ງທີ່ມີຜົນຕໍ່ ການຈະເລີນເຕີບໂຕຂອງພືດ, ມີຜົນຕໍ່ການຄາຍນ້ຳຂອງໃບ, ມີອິດທິພົນຕໍ່ການອອກດອກ ແລະ ມີຄວາມສຳຄັນຕໍ່ຄຸນນະພາບຂອງດອກໄມ້; 5). ຝຸ່ນ ການຈະເລີນເຕີບໂຕຂອງພືດ ນັ້ນຕ້ອງການທາດອາຫານ ເພື່ອໃຊ້ໃນການຈະເລີນເຕີບໂຕ ໂດຍໄດ້ຮັບທາດອາຫານຈາກດິນ ນ້ຳ ແລະ ອາກາດ
ໂດຍທົ່ວໄປ ການຜະລິດ
ເພື່ອຈຳໜ່າຍ
ຫຼື ເພື່ອການຄ້າ ທາດອາຫານທີ່ຢູ່ໃນດິນຈະພຽງພໍຕໍ່ການຈະເລີນເຕີບໂຕຂອງພືດ ເຊິ່ງມີຄວາມຈຳເປັນຕ້ອງໄດ້ ໃຫ້ຝຸ່ນຄອກ, ຝຸ່ນປົ່ມ ເພື່ອປັບປຸງປຳລຸງດີນ ແລະ ໃຫ້ຝຸ່ນວິທະຍາສາດ ເພື່ອເພີ່ມທາດອາຫານລົງໃນດິນ; 6). ພະຍາດ ແລະ ແມງໄມ້: ພະຍາດທີ່ມັກເກີດຂື້ນກັບພືດ ມີທັງພະຍາດທີ່ມີສາເຫດຈາກເຊື້ອລາ, ແບກຕີເລຍ ສ່ວນແມງໄມ້ກໍ່ມີຫຼາຍຊະນິດ ຈົນນັບຈຳນວນບໍ່ຖ້ວນ ສ່ວນໃຫຍ່ ແບ່ງເປັນ ສອງປະເພດຄື: ປະເພດທີໜຶ່ງແມ່ນ: ປະເພດປາກກັດ ໄດ້ແກ່ ພວກຕັກກະແຕນ, ໜອນແມງກະເບື້ອ ແລະ ອື່ນໆ… ລັກສະນະການເຂົ້າທຳລາຍ ແມ່ນການກັດກິນໃບ ເຮັດໃຫ້ພືດບໍ່ສາມາດສັງເຄາະແສງໄດ້ ຢຸດຊະງັກການຈະເລີນເຕີບໂຕ ແມງໄມ້ປາກກັດບາງຊະນິດ ກັດ ແຫ້ນ
ເຂົ້າເຖິງກິ່ງກ້ານ ທຳລາຍທໍ່ນ້ຳ ແລະ ທໍ່ອາຫານ ຖ້າຖືກທຳລາຍຫຼາຍ ຕົ້ນໄມ້ກໍ່ຈະຕາຍໄດ້ ແລະ ປະເພດທີ່ສອງຄື: ປະເພດປາກດູດນ້ຳລ້ຽງ ໄດ້ແກ່ ເພ້ຍແປ້ງ, ເພ້ຍໄພ ແລະ ອື່ນໆ…
ວິທີການເຂົ້າທຳລາຍແມ່ນ ການດູດນ້ຳລ້ຽງຈາກໃບ ແມງປາກດູດບາງຊະນິດ ຍັງປ່ອຍສານພິດໃສ່ໃບ ເຮັດໃຫ້ໃບສີຊີດ ຈາງ ໃບຫ່ຽວແຫ້ງ ແລະ ລົ່ນກ່ອນອາຍຸ ຕົ້ນໄມ້ຢຸດຊະງັກການຈະເລີນເຕີບໂຕ ແລະ ຕາຍໃນທີ່ສຸດ, ການປ້ອງກັນ ແລະ ກຳຈັດແມ່ນ ແນະນຳໃຫ້ໃຊ້ເຕັກນິກການປ້ອງກັນພືດແບບປະສົມປະສານ, ການໃຊ້ແຮງງານໃນການບົວລະບັດຮັກສາ ຕະຫຼອດຮອດການນຳໃຊ້ສະໝຸນໄພໃນການຂັບໄລ່ພະຍາດແມງໄມ້ ເປັນສິ່ງທີ່ຄວນແນະນຳກ່ອນ ແລະ ຖ້າຈຳເປັນ ການນຳໃຊ້ຢາປາບສັດຕູພືດ ກໍ່ເປັນທາງເລືອກໃນການປ້ອງກັນ ແລະ ກຳຈັດພະຍາດແມງໄມ້ ສັດຕູພືດ;
7). ການຕັດແຕ່ງ ຈະມີຜົນຕໍ່ການຈະເລີນເຕີບໂຕ ແຕກກິ່ງກ້ານສາຂາຂອງຕົ້ນໄມ້ ເຊິ່ງເຮົາຈະສາມາດ ກຳນົດຮູບຮ່າງ
ແລະ ຮູບຊົງຂອງຕົ້ນໄມ້ນັ້ນ ລວມທັງການຕັດກິ່ງໄມ້ ທີ່ຕຶບໜາອອກ ຈະເປັນການສ່ວນໃຫ້ປະສິດທິພາບໃນການສັງເຄາະແສງດີຂື້ນ ແລະ ຊ່ວຍໃຫ້ການຈະເລີນເຕີບໂຕໄດ້ດີ; 8). ຕຳແໜ່ງ ຫຼື ສະຖານທີ່ປູກ ມີຜົນຕໍ່ການຈະເລີນເຕີບໂຕຂອງພືດ ການຮຽນຮູ້ ລັກສະນະທາງພຶກສາສາດ
ເບື້ອງຕົ້ນ ຂອງພືດ
ແຕ່ລະຊະນິດ ຈະຊ່ວຍໃຫ້ເຮົາສາມາດເລືອກສະຖານປູກທີ່ມີຄວາມເໝາະສົມໃຫ້ແກ່ພືດ ແຕ່ລະຊະນິດ ເພື່ອການຈະເລີນເຕີບໂຕທີ່ດີ ຂອງພືດນັ້ນໆ ເປັນຕົ້ນພືດ ທີ່ມັກແສງສະຫວ່າງຫຼາຍ ຄວນປູກກາງແຈ້ງ ກົງກັນຂ້າມ ພືດ ທີ່ມັກຮົ່ມຄວນປູກກ້ອງຮົ່ມໄມ້ໃຫຍ່ ແລະ ລັກສະນະອື່ນໆ…
ປະເດັນຫຼັກໃນບົດ: “ດິນ,ຄວາມຊຸ່ມຫຼືນ້ຳ, ແສງສະຫວ່າງ,
ອຸນຫະພູມ,ການຕັດແຕ່ງ,ຝຸ່ນ,ພະຍາດແລະແມງ ໄມ້,ການຕັດແຕ່ງ ແລະ ຕຳແໜ່ງຫຼືສະຖານທີ່ປູກ
ເປັນປັດໃຈສຳຄັນທີ່ມີຜົນຕໍ່ການຈະເລີນເຕີບໂຕ ຂອງໄມ້ດອກໄມ້ປະດັບ.”
ไม่มีความคิดเห็น:
แสดงความคิดเห็น