ເພື່ອນຜູ້ອ່ານທີ່ຮັກແພງທັງຫຼາຍ,
ໃນປັດຈຸບັນຄໍາວ່າ: “ໂລກກາພິວັດ” ໄດ້ເປັນທີ່ຮູ້ຈັກກັນແຜ່ຫຼາຍ ແລະ
ຖືກນໍາມາພົວພັນໃນຫຼາຍສາຂາວິຊາ ເຊັ່ນ: ວິທະຍາສາດ-ເຕັກນິກ, ການສື່ສານ ແລະ
ເສດຖະກິດ ເປັນຕົ້ນ. ມັນກໍ່ອາດຈະເປັນເລື່ອງຍາກ
ທີ່ເຮົາຈະຫາຄໍານິຍາມທີ່ຖືກຕ້ອງ ແລະ ຊັດເຈນຂອງຄໍາວ່າ “ໂລກາພິວັດ”
ແມ່ນຫຍັງກັນແທ້? ແຕ່ໂດຍທົ່ວໄປແລ້ວ, ພວກເຮົາສາມາດທໍາຄວາມເຂົ້າໃຈກັບຄວາມໝາຍຂອງຄໍາວ່າ
“ໂລກາພິວັດ” ດັ່ງນີ້: “ໂລກາພິວັດ” ຢູ່ໃນພາສາອັງກິດແມ່ນ Globalization
ເຊິ່ງແປຕາມສັບຈະມີຄວາມໝາຍວ່າ ທົ່ວທັງໂລກ, ໂລກທີ່ໄຮ້ພົມແດນ,
ໂລກທີ່ກ່ຽວພັນກັນ ຫຼືຄວາມປ່ຽນແປງທີ່ກະທົບເຖິງກັນໃນທົ່ວໂລກ,
ນອກຈາກນັ້ນ ບາງທັດສະນະຍັງກ່າວວ່າ: ໂລກາພິວັດ ແມ່ນໂລກທີ່ຖືກຫຍໍ້ໃຫ້ແຄບເຂົ້າ.
ເນື່ອງຈາກຄໍາວ່າ:
“ໂລກາພິວັດ” ຖືກນໍາມາໃຊ້ຢ່າງກວ້າງຂວາງໃນເກືອບທຸກຂະແໜງວິຊາການ,
ສະນັ້ນ ຕ່າງກໍ່ຕີຄວາມໝາຍຄໍາວ່າ “ໂລກາພິວັດ”
ເຂົ້າໃນວຽກງານຂອງຕົນຕາມຈຸດພິເສດສະເພາະ ເຊັ່ນ:
ຢູ່ໃນວຽກງານໂທລະຄົມມະນາຄົມ “ໂລກາພິວັດ” ໝາຍເຖິງການຕິດຕໍ່ ແລະ
ສົ່ງຂໍ້ມູນ-ຂ່າວສານ ເຊິ່ງກັນແລະກັນໄດ້ຢ່າງວ່ອງໄວ ແລະ
ຄວບຄຸມທຸກພາກພື້ນຂອງໂລກ, ຢູ່ໃນວຽກງານເສດຖະກິດ ຖືວ່າການນໍາສິນຄ້າ
ເຂົ້າ-ອອກລະຫວ່າງປະເທດ ສາມາດດໍາເນີນໄປຢ່າງວ່ອງໄວ ແລະ ເປັນເສລີ,
ການນໍາເອົາທຶນຈາກປະເທດໜຶ່ງໄປສູ່ອີກປະເທດໜຶ່ງກໍ່ໄດ້ດໍາເນີນໄປໄດ້ຢ່າງເສລີ
ແລະ ສາມາດນໍາໃຊ້ມາດຕະຖານໃກ້ຄຽງກັນ, ຖ້າເບິ່ງສະເພາະໃນຄວາມກ້າວໜ້າທາງດ້ານວິທະຍາສາດ-ເຕັກນິກ
ຖືວ່າທຸກສ່ວນຂອງໂລກ ລ້ວນແຕ່ໄດ້ຮັບຜົນປະໂຫຍດນໍາກັນ. ນອກຈາກນີ້,
ດ້ານວັດທະນະທໍາ, ສິ່ງແວດລ້ອມ ແລະ ດ້ານອື່ນໆ
ກໍ່ລ້ວນແຕ່ໄດ້ຮັບຜົນກະທົບຈາກກະແສ “ໂລກາພິວັດ”
ເຊິ່ງເປັນທີ່ຮູ້ຈັກກັນຢ່າງແຜ່ຫຼາຍໃນຊຸມປີ 90 ມານີ້ເອງ.
ທ່ານ ສາດສະດາຈານ ໂອຊະດະ
ຮິໂຣຊິ ເຄີຍໄດ້ຂຶ້ນບັນຍາຍຢູ່ທີ່ມະຫາວິທະຍາໄລຍາໂກຢາ (ປະເທດຍີ່ປຸ່ນ)
ໃນວັນທີ 5 ພະຈິກ 2002 ໂດຍທ່ານໄດ້ກ່າວເຖິງເບື້ອງຫຼັງ ແລະ
ແຮງຊຸກດັນຂອງ “ໂລກາພິວັດ” ວ່າ:
ເບື້ອງຫຼັງຂອງໂລກາພິວັດແມ່ນມາຈາກການປະຕິວັດທາງດ້ານເທັກໂນໂລຊີ,
ຂໍ້ມູນ-ຂ່າວສານ, ຈາກປະສິດທິພາບທາງດ້ານຄົມມະນາຄົມ ແລະ ການຂົນສົ່ງທີ່ນັບມື້ສູງຂຶ້ນ;
ຈາກນະໂຍບາຍການເປີດເສລີດ້ານການຄ້າ ແລະ ການເປີດເສລີດ້ານການຈໍລະຈອນທຶນຢູ່ໃນໂລກ,
ສ່ວນແຮງຊຸກດັນ
ແມ່ນມາຈາກການເຄື່ອນໄຫວເຮັດທຸລະກິດຂ້າມຊາດຂອງບັນດາບໍລິສັດ
ພາຍໃຕ້ເສດຖະກິດຕະຫຼາດ. ຢູ່ໃນແນວທາງນະໂຍບາຍຂອງພັກ-ລັດຖະບານເຮົາ
ກໍ່ໄດ້ກ່າວເຖິງທ່າອ່ຽງການຫັນເປັນກວມໂລກ, ຫັນເປັນຂົງເຂດ, ພາກພື້ນ ແລະ
ກະແສໂລກາພິວັດ ມາເປັນເວລາດົນນານພໍສົມຄວນ ເຊິ່ງປະທານ ໄກສອນ ພົມວິຫານ, ຜູ້ນໍາທີ່ແສນ
ເຄົາລົບຮັກຂອງລາວເຮົາ ກໍ່ເຄີຍໄດ້ກ່າວຕໍ່ກອງປະຊຸມສາມັນປະຈໍາປີຂອງສະພາປະຊາຊົນສູງສຸດ
ໃນວັນທີ 2 ກຸມພາ 1988 ໃນບາງຕອນວ່າ:
ດ້ວຍການກະທົບຂອງປະຕິວັດວິທະຍາສາດ-ເຕັກນິກກໍາລັງການຜະລິດຂອງໂລກ
ໄດ້ຂະຫຍາຍຕົວດ້ວຍຂະໜາດທີ່ບໍ່ເຄີຍມີມາກ່ອນ. ການຂະຫຍາຍຕົວດັ່ງກ່າວ
ບໍ່ໄດ້ຖືກຈໍາກັດໄວ້ຢູ່ແຕ່ໃນຂອບເຂດຂອງປະເທດໃດໜຶ່ງອີກແລ້ວ, ແຕ່ຫາກໄປຕາມທ່າອ່ຽງແຫ່ງການຫັນເສດຖະກິດໃຫ້ມີລັກສະນະສາກົນຢ່າງແຂງແຮງ.
ທ່າອ່ຽງແຫ່ງການຫັນເສດຖະກິດໃຫ້ມີລັກສະນະສາກົນນັ້ນ
ບໍ່ພຽງແຕ່ສະແດງອອກຢູ່ໃນການເປີດກວ້າງການແລກປ່ຽນສິນຄ້າ, ການສົ່ງທຶນອອກຕ່າງປະເທດເທົ່ານັ້ນ,
ແຕ່ຍັງສະແດງອອກໃນການຂະຫຍາຍຮູບການຕ່າງໆອີກເຊັ່ນ:
ການສະໜອງການບໍລິການໃຫ້ກັນ, ການຮ່ວມມືກັນໃນການຜະລິດ,
ການຮ່ວມມືກັນໃນດ້ານວິທະຍາສາດ-ເຕັກນິກ, ການເງິນ, ເງິນຕາ ແລະ ການສໍາພັນກັນ
ໃນດ້ານເສດຖະກິດ. ເສດຖະກິດຂອງໂລກຊູ່ມື້ນີ້ແມ່ນເປັນເອກະພົບອັນດຽວ
ເຊິ່ງແຕ່ລະປະເທດຈະເປັນພາກສ່ວນຕັດແຍກອອກຕ່າງຫາກ ແລະ
ຂະຫຍາຍຕົວໄປຕາມແບບກຸ້ມຕົນເອງພໍໃຜພໍລາວແມ່ນບໍ່ໄດ້.
ການຂະຫຍາຍຕົວທາງດ້ານເສດຖະກິດຂອງປະເທດຕ່າງໆ
ແມ່ນດໍາເນີນໄປໃນເງື່ອນໄຂທີ່ທັງມີການກະທົບຕໍ່ກັນແລະກັນ,
ທັງເອກະລາດ, ທັງຂຶ້ນນໍາກັນ, ທັງສູ້ຢັນກັນ, ທັງຮ່ວມມືກັນ,
ແຕ່ລະປະເທດຈະເປັນປະເທດໃຫຍ່ທີ່ມີລະດັບສູງ ແລະ
ມີຄວາມອາດສາມາດບົ່ມຊ້ອນອັນໃຫຍ່ຫຼວງກໍ່ດີ
ລ້ວນແຕ່ຕ້ອງນໍາໃຊ້ການແບ່ງງານສາກົນ ເພື່ອພັດທະນາປະເທດຂອງໃຜລາວ. ຢືນຢູ່ຕໍ່ໜ້າສະພາບການດັ່ງກ່າວ,
ການທີ່ປະເທດຕ່າງໆໄດ້ດໍາເນີນການດັດແປງຍຸດທະສາດດ້ານເສດຖະກິດ-ສັງຄົມ,
ປ່ຽນແປງໂຄງປະກອບເສດຖະກິດ ແລະ ກົນໄກຄຸ້ມຄອງ,
ເປີດກວ້າງການພົວພັນດ້ານເສດຖະກິດກັບຕ່າງປະເທດອັນແນໃສ່ປັບຕົວເຂົ້າກັບທ່າອ່ຽງໃໝ່ນັ້ນ
ມັນເປັນຄວາມຮຽກຮ້ອງຕ້ອງການຢ່າງພາລະວິໄສ.
ຈາກເນື້ອໃນຈິດໃຈຂອງບົດຄໍາເຫັນດັ່ງກ່າວ,
ໄດ້ກາຍເປັນການຢັ້ງຢືນເຖິງວິໄສທັດຂອງພັກ ແລະ ລັດຖະບານເຮົາ
ໂດຍສະເພາະແມ່ນຂອງປະທານ ໄກສອນ ພົມວິຫານ ທີ່ເບິ່ງກວ້າງມອງໄກ ທັງໄດ້ຄໍາໜຶງເຖິງເຫດການ
ແລະ ຄວາມເປັນຈິງໃນປັດຈຸບັນ ແລະ
ຄາດຄະເນເຖິງສິ່ງທີ່ຈະເກີດຂຶ້ນໃນພາຍພາກໜ້າຢ່າງຖືກຕ້ອງ.
ສິ່ງທີ່ທ່ານປະທານກ່າວມານັ້ນມັນແມ່ນເນື້ອໃນຂອງໂລກາພິວັດ
ທີ່ມີຜົນກະທົບທາງດ້ານບວກ ແລະ ດ້ານລົບຕໍ່ພວກເຮົາໃນປັດຈຸບັນ.
25-04-2013-B-3-mekong column
ไม่มีความคิดเห็น:
แสดงความคิดเห็น