26-04-2013-B-3-mekong
column
ໂດຍ:
ດຣ. ພັນປະດິດ ພັນດາລາ.
ການຈັດແບ່ງປະເພດຂອງດອກກຸຫຼາບ ຕາມລັກສະນະການໃຊ້ປະໂຫຍດທາງການຄ້າ ໂດຍການຈັດແບ່ງຕາມຕະຫຼາດໂລກເປັນ 5 ປະເພດຄື: ກຸຫຼາບດອກໃຫຍ່ ຫຼື ກຸຫຼາບກ້ານຍາວ, ກຸຫຼາບດອກກາງ ຫຼື ກຸຫຼາບກ້ານຂະໜາດກາງ, ກຸຫຼາບດອກນ້ອຍ ຫຼື ກຸຫຼາບກ້ານສັ້ນ, ກຸຫຼາບດອກຊໍ່ ແລະ ກຸຫຼາບໜູ. ເຊິ່ງການຄັດເລືອກສາຍພັນກຸຫຼາບໃນປັດຈຸບັນຈະຄຳນຶງເຖິງຜົນປະໂຫຍດ ແລະ ຄວາມຄຸ່ມຄ່າທີ່ຜູ້ຊື້ຈະໄດ້ຮັບຫຼາຍກວ່າ ການທີ່ຈະຄຳນຶງສະເພາະຄວາມງາມຂອງດອກ ເພາະຖ້າດອກງາມ ແຕ່ເມື່ອຊື້ໄປແລ້ວຈະຫ່ຽວແຫ້ງທັນທີກໍ່ບໍ່ຄຸ້ມຄ່າ ດັ່ງນັ້ນ ນັກປັບປຸງພັນ ຈຶ່ງມັກພິຈາລະນາລັກສະນະຕ່າງໆຂອງດອກກຸຫຼາບ ດັ່ງນີ້: 1). ມີຜົນຜະລິດຕໍ່ພື້ນທີ່ສູງ
ປັດຈຸບັນກຸຫຼາບດອກນ້ອຍໃຫ້ຜົນຜະລິດສູງເຖິງ 300 ດອກ/ຕາແມັດ/ປີ; 2). ອາຍຸການຈັດໃສ່ເຕົ້າດອກໄມ້ ພັນກຸຫຼາບໃນສະໄໝທົດສະຕະວັດທີ່ແລ້ວ
(10ປີກ່ອນ) ຈະບານໄດ້ພຽງ 5-6 ວັນ ແຕ່ສາຍພັນປັດຈຸບັນ
ກຸຫຼາບພັນໃໝ່ໆບາງສາຍພັນ ສາມາດບານໄດ້ເຖິງ 16 ວັນ; 3).ກຸຫຼາບທີ່ສາມາດດູດນ້ຳໄດ້ດີ; 4). ກຸຫຼາບທີ່ບໍ່ມີໜາມ
ຫຼື ໜາມໜ້ອຍເພື່ອຄວາມສະດວກໃນການຈັດການ; 5). ສີຂອງດອກ
ສີແດງຍັງເປັນທີ່ນິຍົມຂອງຕະຫຼາດຢູ່ ຮອງລົງມາແມ່ນ ສີບົວ ສີອ່ອນເຢັນຕາ
ແລະ ສອງສີໃນດອກດຽວກັນ; 6). ກິ່ນຫອມ ເປັນທີ່ໜ້າເສຍດາຍທີ່ກຸຫຼາບກິ່ນຫອມມັກບໍ່ທົນ
ແຕ່ກໍ່ມີການປະສົມພັນກຸຫຼາບຕັດດອກທີ່ມີກິ່ນຫອມບາງຈຳນວນ
ໂດຍສະເພາະສໍາຫຼັບຕະຫຼາດທ້ອງຖິ່ນ; 7). ມີຄວາມຕ້ານທານພະຍາດ
ແລະ ທົນຄວາມເສຍຫາຍຈາກການຈັດການສູງ
ການຂະຫຍາຍພັນກຸຫຼາບ
ກຸຫຼາບ
ສາມາດຂະຫຍາຍພັນໄດ້ຫຼາຍວິທີເຊັ່ນ: ການຕັດຊຳ, ການຕອນ, ການຕິດຕາ ແລະ ການລ້ຽງເນື້ອເຍື່ອ
ເພື່ອໃຫ້ໄດ້ຕົ້ນກຸຫຼາບທີ່ມີລະບົບຮາກທີ່ແຂງແຮງ ແລະ ໃຫ້ຜົນຜະລິດສູງ
ຊາວກະສິກອນມັກນິຍົມກຸຫຼາບພັນດີທີ່ຕິດຕາເທິງຕໍກຸຫຼາບປ່າ.
ການຕັດຊຳ: ການຕັດຊຳທີ່ນິຍົມຢູ່ທົ່ວໄປຄື
ການເລືອກເອົາກິ່ງທີ່ບໍ່ອ່ອນ ບໍ່ແກ່ ຈົນເກີນໄປ
ມາຕັດເປັນທ່ອນປະມານ 12 ຫາ 15 ຊັງຕີແມັດ
ຫຼື 1 ຄືບ ເຊິ່ງຮອຍຕັດຕ້ອງຢູ່ກ້ອງຂໍ້ພໍດີ ແລ້ວເຊາະໃບຢູ່ໂຄນກິ່ງອອກ
ຈາກນັ້ນຕັດໂຄນກິ່ງຖີ້ມ ແລ້ວຈຸ່ມກິ່ງທີ່ຈະຊຳ ລົງໃນຮໍໂມນເຮັ່ງຮາກ (ມີຂາຍທົ່ວໄປຕາມຮ້ານຂາຍເຄື່ອງກະສິກຳ ຫຼື ຢາປາບສັດຕູພືດ)
ແລ້ວນຳມາເປີຍລົມໃຫ້ແຫ້ງ ກ່ອນນຳໄປປັກຊຳໃນແປງຜົ່ນໝອກ
ເຊິ່ງມີເຄື່ອງຝົ່ນແບບຝົນຝອຍ ຫຼື ນຳໄປຊຳໃນສະຖານທີ່ຊຸ່ມເຢັນ ແລະ
ມີການຫົດນ້ຳເປັນໄລຍະ ໂດຍມີຫຼັກການວ່າບໍ່ໃຫ້ໃບກຸຫຼາບແຫ້ງ ແລ້ວກຸຫຼາບຈະອອກຮາກໃນ
12 ຫາ 15 ວັນ. ການຊຳກິ່ງເປັນທີ່ນິຍົມຫຼາຍໃນປັດຈຸບັນ ເພາະໃຊ້ຕົ້ນທຶນໜ້ອຍ
ແລະ ໄລຍະເວລາອັນສັ້ນ ແຕ່ຕົ້ນທີ່ໄດ້ຈາກການຊຳກິ່ງເມື່ອໄປປູກ ຈະເຮັດໃຫ້ຕົ້ນໂຊມໄວ
ອາດປູກໄດ້ພາຍໃນ 3 ຫາ 4 ປີ ແລະ
ກຸຫຼາຍສາຍພັນສີຂາວ ແລະ ສີ ເຫຼືອງຈະອອກດອກຍາກ.
ການຕອນ: ກິ່ງທີ່ໄຊ້ຕອນ ມັກຈະມີສະພາບແຕກຕ່າງກັນ ທັງກິ່ງອ່ອນ ແລະ ກິ່ງແກ່ປົນກັນໄປເຮັດໃຫ້ການຈະເລີນເຕີບໂຕຂອງກຸຫຼາບ
ຫຼັງຈາກປູກລົງໜານຈະບໍ່ສະໝໍ່າສະເໝີ ເຊິ່ງການຕອນຈະໄຊ້ເວລາໃນການອອກຮາກດົນ
ປະມານ 4 ຫາ 7 ອາທິດ ຂື້ນກັບສາຍພັນ
ການຕິດຕາ: ວິທີການຕິດຕາຂ້ອນຂ້າງຫຍຸ້ງຍາກ
ແລະ ຕ້ອງໄຊ້ເວລາໃນການເຮັດຫຼາຍກ່າວການຊຳ ແລະ ການຕອນ
ຄືຕ້ອງໄດ້ຕັດຊຳຕົ້ນຕໍ ໄປຈົນຮອດການນຳເອົາສາຍພັນທີ່ດີ ມາຕິດຕາ
ຈົນຮອດອອກດອກທຳອິດນັ້ນ ຕ້ອງໄຊ້ເວລາປະມານ 5 ຫາ 6 ເດືອນ ໂດຍຂັ້ນຕອນທຳອິດ ຕ້ອງຕັດຊໍາຕົ້ນຕໍ (ກຸຫຼາບປ່າ)
ໃຫ້ອອກຮາກ ແລະ ລ້ຽງຕົ້ນຕໍນັ້ນ ຈົນອອກຍອດໃໝ່ ໃຫ້ຢ່າວກ່ວາ
30 ຊັງຕີແມັດ ເຊິ່ງຕ້ອງໄຊ້ເວລາປະມານ 3 ເດືອນ (ຫຼັງຈາກຊຳ ແລະ ອອກຮາກ) ຈາກນັ້ນ ຈຶ່ງເອົາຕາພັນດີ ມາຕິດຕາ ທີ່ບໍລິເວນໂຄນຂອງຕົ້ນຕໍ
ເຊິ່ງການຕິດຕາຕ້ອງອາໃສຄວາມຊຳນານພໍສົມຄວນ ໂດຍຈະໃຊ້ວິທີໃດກໍ່ໄດ້
ເຊັ່ນ: ແບບໂຕເຕ (T), ແບບສີ່ລ່ຽມ
ແລະ ອື່ນໆ…
ການລ້ຽງເນຶ້ອເຢື່ອ: ເປັນການນຳເອົາສ່ວນໃດສ່ວນໜຶ່ງຂອງພືດ
ເຊິ່ງມັກນິຍົມນຳໃຊ້ສ່ວນຍອດອ່ອນ ໄປເພາະລ້ຽງໃນຫ້ອງທົດລອງ
ເພື່ອໃຫ້ໄດ້ຕົ້ນອ່ອນອອກມາ ຂໍ້ດີຄື ສາມາດຜະລິດໄດ້ເທື່ອລະຫຼາຍໆ ແລະ ກຳນົດໄລຍະການຈະເລີນເຕີບໂຕ
ແລະ ອອກດອກໄດ້ດີ ແຕ່ຂໍ້ເສຍຄືຂ້ອນຂ້າງຫຍຸ້ງຍາກ ແລະ ໃຊ້ຕົ້ນທຶນ ແລະ ເຕັກນິກວິຊາການຂັ້ນສູງ ຈະເປັນບໍລິສັດຂະໜາດໃຫຍ່
ທີ່ນິຍົມໃຊ້.
ສະພາບທີ່ເໝາະສົມໃນການປູກ
ພື້ນທີ່ປູກ
ຄວນປູກໃນບ່ອນທີ່ລະບາຍນ້ຳໄດ້ດີ ມີຄວາມເປັນສົ້ມເລັກນ້ອຍ (ດິນສົ້ມ) pH ປະມານ 6-6.5 ແລະ ໄດ້ຮັບແສງແດດຢ່າງນ້ອຍ 6 ຊົ່ວໂມງ, ອຸນນະພູມທີ່ເໝາະສົມໃນການຈະເລີນຂອງກຸຫຼາບຄື: ກາງຄືນ 15-18˚C ແລະ ກາງເວັນ
20-25˚C ເຊິ່ງເປັນຊ່ວງອຸນນະພູມທີ່ຈະເຮັດໃຫ້ດອກກຸຫຼາບມີຄຸນນະພາບດີ
ແລະ ໃຫ້ຜົນຜະລິດສູງ. ຫາກອຸນນະພູມຕ່ຳກວ່າ
15˚C ການຈະເລີນເຕິີບໂຕ
ແລະ ການອອກດອກຈະຊ້າຫຼາຍ, ຫາກອຸນນະພູມສູງກວ່າ 28˚C ຄວນໃຫ້ມີຄວາມຊຸ່ມໃນອາກາດສູງ
ເພື່ອຫຼຸດຜ່ອນການຄາຍນ້ຳ. ຄວາມຊຸ່ມສຳພັດທີ່ເໝາະສົມກັບການຈະເລີນເຕີບໂຕ ຂອງກຸຫຼາບຄື
70-80% ກຸຫຼາບຈະໃຫ້ຜົນຜະລິດສູງ
ແລະ ດອກມີຄຸນນະພາບດີ ຖ້າຄວາມເຂັ້ມຂອງແສງຫຼາຍ ແລະ ຊ່ວງກາງເວັນຍາວ
ການໃຫ້ນ້ຳ
ກຸຫຼາບ
ເປັນພືດທີ່ຕ້ອງການຄວາມຊຸ່ມຊື່ນສູງ ປະລິມານການໃຫ້ນ້ຳລົງໃນດິນ
ຄວນໃຫ້ຊຸ່ມເລິກ ປະມານ 40 ຫາ 45 ຊັງຕີແມັດ. ການໃຫ້ນ້ຳດ້ວຍລະບົບນ້ຳຢອດ
ຫຼື ໃຊ້ຫົວພົ່ນນ້ຳລະຫວ່າງແຖວປູກ ອັດຕາ 6-7 ລິດ/ຕາແມັດ/ອາທິດ. ອາດໃຫ້ທຸກມື້, ມື້ບາມື້ ຫຼື
2-3 ວັນຕໍ່ຄັ້ງ
ແລ້ວແຕ່ສະພາບການອຸ້ມນ້ຳຂອງດິນ ຢ່າຫົດນ້ຳໃຫ້ດິນປຽກຫຼາຍຕະຫຼອດເວລາ
ຄວນໃຫ້ດິນມີໂອກາດລະບາຍນ້ຳ ແລະ ມີອາກາດເຂົ້າໄປແທນທີ່, ສິ່ງທີ່ຄວນຄຳນຶງເຖິງຄື
ບໍ່ຄວນໃຫ້ນ້ຳ ໃຫ້ຖືກໂຄນໃບກຸຫຼາບ ເພາະພະຍາດບາງຊະນິດ ທີ່ຢູ່ຕາມໃບ ຫຼື
ກິ່ງຈະແພ່ລະບາດ ແລະ ກະຈາຍໄດ້ງ່າຍ ການຫົດນ້ຳ
ກໍ່ບໍ່ຄວນຫົດລົງດິນຢ່າງຮຸ່ນແຮງຈົນເມັດດິນພົ້ງ ກະເດັນຖືກຕົ້ນ
ຈະເຮັດໃຫ້ພະຍາດບາງຊະນິດໃນດິນ ລະບາດຂື້ນຕົ້ນໄດ້ງ່າຍ.
ການໃສຝຸ່ນ
ໃສ່ຝຸ່ນຮອງພື້ນກ່ອນປູກຄື ຝຸ່ນທີ່ປະສົມກັບເຄື່ອງປູກກ່ອນການປູກພືດ
ຊຶ່ງໃຫ້ປະໂຫຍດ 2 ຢ່າງຄື: ໃຫ້ທາດອາຫານທີ່ພືດຕ້ອງການຢ່າງພຽງພໍຕັ້ງແຕ່ເລີ່ມປູກ
ແລະ ໃຫ້ທາດອາຫານບາງຊະນິດໃນປະລິມານຫຼາຍ ແລະ
ພຽງພໍສຳຫຼັບການປູກພືດຕະຫຼອດລະດູ ຊຶ່ງເຮັດໃຫ້ສາມາດລົດການໃຫ້ຝຸ່ນນັ້ນໆໄດ້. ລະຫວ່າງການປູກພືດ ການໃຫ້ທາດອາຫານທຸກຊະນິດແກ່ພືດໃນເວລາປູກ
ເຮັດໄດ້ລຳບາກເນື່ອງຈາກມີເຖິງ 13 ທາດ ທາດບາງຊະນິດຈະມີໃນດິນຢູ່ແລ້ວ
ບາງຊະນິດຕ້ອງໃຫ້ເພີ່ມເຕີມຫາກເປັນໄປໄດ້ຄວນສົ່ງດິນໄປວິໃຈກ່ອນເພື່ອຈະໄດ້ຮັບຄຳແນະນຳວ່າຄວນປັບປຸງດິນໄດ້ແນວໃດ. ໂດຍທົ່ວໄປແລ້ວ ການໃຫ້ຝຸ່ນໃນໄລຍະທຳອິດຂອງການປູກ
ເປັນໄລຍະທີ່ຕົ້ນກຸຫຼາບຈະເລີນເຕີບໂຕ ສ້າງໃບ ແລະ ກິ່ງ
ຄວນໃສ່ຝຸ່ນເຄມີທີ່ມີສູດ ຕົວທຳອິດ ຄື ໄນໂຕຼເຈນ ໃນປະລິມານທີ່ສູງ
ໂດຍໃສ່ທຸກໆ 15 ຫຼື 30 ວັນ
ໃນປະລິມານການໃສແບບກະຕວງປະມານໜຶ່ງກຳມື ຕໍ່ຕົ້ນ
ກ່ອນໃສ່ຝຸ່ນຄວນມີການພວນດິນຕື້ນໆ ຢ່າໃຫ້ກະທົບຮາກຂອງຕົ້ນກຸຫຼາບຫຼາຍ
ໂດຍວ່ານຝຸ່ນອ້ອມໆ ໂຄນຕົ້ນ ໃຫ້ຫ່າງຈາກໂຄນຕົ້ນ 10 ຫາ
15 ຊັງຕີແມັດ ແລ້ວແຕ່ຂະໜາດຂອງຊົງພຸ່ມ ຈາກນັ້ນ
ຄວນຫົດນ້ຳ ໃຫ້ຊຸ່ມພໍປະມານ (ຢ່າຫົດຈົນນ້ຳຖ້ວມ)
ເມື່ອກຸຫຼາບເລີ່ມອອກດອກຄວນໃຫ້ຝຸ່ນເຄມີ ທີ່ສູດໂຕທີສອງ
ແລະ ທີ ສາມ ຄື ຟອດສະຟໍລັດ ແລະ ໂປແຕັດຊຽມສູງ ໄປຄວບຄູ່ກັນ
ເພື່ອເລັ່ງການອອກດອກ ແລະ ເຮັດໃຫ້ກ້ານດອກແຂງແຮງ ນອກຈາກນີ້
ຄວນໃຫ້ຝຸ່ນຊະນິດໃຫ້ທາງໃບໄດ້ ກໍ່ເປັນດີ
ຂໍ້ຄວນລະວັງໃນການໃຫ້ຝຸ່ນຫຼັງຈາກປູກແລ້ວ ຄື
ຄວນວ່ານຝຸ່ນໃຫ້ຮອບໆຕົ້ນຢ່າງສະໜໍ່າສະເໝີ ຢ່າໃສ່ເປັນຈຸ້ມ ຫຼື
ບ່ອນດຽວຫຼາຍໆ ເພາະອາດເຮັດໃຫ້ດິນບໍລິເວນດັ່ງກ່າວເຄັມ ແລະ ກະທົບຕໍ່ຮາກຂອງຕົ້ນກຸຫຼາບໄດ້
ການຕັດແຕ່ງກິ່ງກ້ານກຸຫຼາບ
ການບົວລະບັດຮັກສາກຸຫຼາບໄລຍະທຳອິດຫຼັງການປູກ
ເມື່ອຕາກຸຫຼາບເລີ່ມແຕກ ຄວນສົ່ງເສີ່ມໃຫ້ມີການຈະເລີນທາງໃບ
ເພື່ອການສະສົມອາຫານ ແລະ ສ້າງກິ່ງກ້ານ ເພື່ອໃຫ້ໄດ້ດອກທີ່ມີຂະໜາດໃຫຍ່
ແລະ ກ້ານຍາວ ເຊິ່ງເຮັດໄດ້ດ້ວຍການເດັດຍອດເປັນໄລຍະປະມານ 2-3 ເດືອນ
ໂດຍເດັດສ່ວນເທິງໃບສົມບູນ (5ໃບຍ່ອຍ) ໃບທີ່ສອງຈາກຍອດ ເມື່ອດອກມີຂະໜາດເທົ່າເມັດຖົ່ວ
ຈາກນັ້ນກິ່ງຫຼັກຈະເລີ່ມແທງອອກ ຊຶ່ງກິ່ງຫຼັກນີ້ຈະເປັນໂຄງສ້າງໃຫ້ຕົ້ນກຸຫຼາບ
ທີ່ໃຫ້ດອກມີຄຸນນະພາບດີ.
ການຕັດແຕ່ງກິ່ງ
ການຕັດແຕ່ງກິ່ງກຸຫຼາບປະຕິບັດໄດ້ຫຼາຍວິທີ
ແຕ່ລະວິທີຈະໃຊ້ຫຼັກການທີ່ຄ້າຍຄືກັນ
ຄືຕັດແຕ່ງເພື່ອໃຫ້ໄດ້ກິ່ງທີ່ສົມບູນເພື່ອການຕັດດອກ ແລະ ເພື່ອໃຫ້ໄດ້ກິ່ງຫຼັກ (Water sprout ຫຼື bottom break) ຫຼາຍຂື້ນ ແລະ
ຈະຮັກສາໃບໄວ້ກັບຕົ້ນໃຫ້ຫຼາຍທີ່ສຸດ
ເພື່ອໃຫ້ໄດ້ກິ່ງທີ່ສົມບູນທີ່ສຸດຄວນຮັກສາໃຫ້ພຸ່ມກຸຫຼາບໂລ່ງ ແລະ
ບໍ່ສູງຫຼາຍເກີນໄປ ເພື່ອສະດວກຕໍ່ການບົວລະບັດຮັກສາ ແລະ ແສງແດດສ່ອງຮອດໂຄນຕົ້ນກຸຫຼາບ
ຈະຊ່ວຍກະຕຸ້ນໃຫ້ເກີດກິ່ງຫຼັກອີກດ້ວຍ
ການຕັດແຕ່ງກິ່ງທີ່ນິຍົມໃນປັດຈຸບັນ ໄດ້ແກ່ການຕັດແຕ່ງກິ່ງແບບ ຕັດສູງ
ແລະ ຕັດຕ່ຳ. ເຊິ່ງການຕັດແຕ່ງແບບ
ຕັດສູງ ແລະ ຕ່ຳ (ສູງ ແລະ
ຕ່ຳຈາກຈຸດກຳເນີດຂອງກິ່ງສຸດທ້າຍ) ເປັນການຕັດແຕ່ງເພື່ອໃຫ້ມີການຜະລິດດອກສະໝ່ຳສະ ເໝີຕະຫຼອດປີ.
ກ່ຽວກັບພະຍາດ, ແມງໄມ້, ການປູກ ແລະ
ການບົວລະບັດຮັກສາ ຂອງກຸຫຼາບ ອ່ານຕໍ່ ສະບັບ ທີ 3 ພຶດສະພາ 2013
ໝາຍເຫດ: ເນື້ອຫາສ່ວນໜຶ່ງໄດ້ຈາກການລວບລວມຈາກເອກສານຫຼາຍແຫ່ງ ທີ່ບໍ່ແມ່ນເອກະສານອ້າງອີງທາງດ້ານວິຊາການ ບໍ່ແນະນຳໃຫ້ນັກຮຽນ, ນັກສຶກສາເອົາຂໍ້ມູນ ຫຼື ເນຶ້ອໃນບົດເປັນຂໍ້ມູນອ້າງອີງ.
ປະເດັນຫຼັກໃນບົດ: “ການຄັດເລືອກສາຍພັນກຸຫຼາບໃນປັດຈຸບັນຈະຄຳນຶງເຖິງຜົນປະໂຫຍດ ແລະ ຄວາມຄຸ່ມຄ່າທີ່ຜູ້ຊື້ຈະໄດ້ຮັບຫຼາຍກວ່າ ການທີ່ຈະຄຳນຶງສະເພາະຄວາມງາມຂອງດອກ ເພາະຖ້າດອກງາມ ແຕ່ເມື່ອຊື້ໄປແລ້ວຈະຫ່ຽວແຫ້ງທັນທີກໍ່ບໍ່ຄຸ້ມຄ່າ”
ไม่มีความคิดเห็น:
แสดงความคิดเห็น