ຫັດຖະກຳມູນພໍ່
ປະຍຸກສິລະປະລາຍລາວ ລົງສູ່ຜືນຜ້າ
ລວດລາຍທີ່ບົ່ງບອກເຖິງຄວາມເປັນເອກະລັກ,
ຄວາມອຸດົມສົມບູນ ແລະ ການດຳລົງຊີວິດຂອງຄົນລາວ ລວມທັງລວດລາຍທີ່ແກະສະຫຼັກ
ແລະ ປັກແສ່ວໂດຍຝີມື້ທີ່ເປັນຊັບສົມບັດອັນລ້ຳຄ່າຂອງຊາດ ໄດ້ຖ່າຍທອດໄວ້ໃຫ້ລູກຫຼານໄດ້ເບິ່ງໄດ້ຊົມ
ໃນປັດຈຸບັນນີ້ຄົນລຸ້ນໃໝ່ມັກໂຊສີໄມ້ລາຍມືໂດຍການແຕ້ມລວດລາຍ ລາວປະສົມກັບຄວາມທັນສະໄໝໂດຍການໃຊ້ຄວມພິວເຕີເຂົ້າມາອອກແບບເປັນກາເສື້ອທີ່ສວຍງາມ
ແລະ ບົ່ງບອກເຖິງຄວາມເປັນລາວ.
ທ່ານ
ສຸວັນນີ ພັນດານຸວົງ ເຈົ້າຂອງຮ້ານຫັດຖະກຳມູນພໍ່ໄດ້ໃຫ້ສຳພາດຕໍ່ທີມງານໜັງສືພິມເສດຖະກິດ-ການຄ້າວ່າ:
ກ່ອນຈະມາເລີ່ມກໍ່ຕັ້ງຮ້ານ
“ຫັດຖະກຳມູນພໍ່” ຕົນເອງເຄີຍເຮັດວຽກວົງການນັກຂ່າວ ແລະ ນັກອອກແບບວາລະສານຕ່າງໆມາກ່ອນ
ແລະ ອີກຢ່າງໜຶ່ງແມ່ນໄດ້ເຮັດວຽກຢູ່ກະຊ່ວງຖະແຫຼ່ງຂ່າວ ແລະ ວັດທະນາທໍາທີ່ມີຈິດໃຈມັກຮັກປະເພນີ
ແລະ ວັດຖະນາທຳລາວ ທີ່ເປັນເອກະລັກຂອງຊາດລາວ ສະນັ້ນກໍ່ໄດ້ກໍ່ຕັ້ງຫັດຖະກຳມູນພໍ່ຂຶ້ນ
ເພື່ອສົ່ງເສີ່ມວັດທະນາທຳລາວ ແລະ ອີກຢ່າງແມ່ນຕ້ອງການສ້າງເປັນທຸລະກິດສ່ວນຕົວຂະໜາດນ້ອຍ.
ຫັດຖະກຳມູນພໍ່ເກີດຂຶ້ນໄດ້ກໍ່ຍ້ອນຕົນເອງທີ່ມີຄວາມຄິດມັກຮັກສີລະປະ,
ວັດທະນະທຳປະເພນີອັນດີງາມຂອງຊາດ ແລະ ເປັນເອກະລັກສະເພາະດ້ານ ຈຶ່ງຢາກສະແດງເຖິງສີໄມ້ລາຍມືທີ່ຕົນເອງສາມາດເຮັດໄດ້
ແລະ ຕ້ອງສ້າງຜະລິດຕະພັນລາວ ໃຫ້ຄົນລາວໄດ້ຊົມໃຊ້ ແລະ ຄົນຕ່າງປະເທດທີ່ເຂົ້າມາຢ້ຽມຢາມປະເທດລາວແລ້ວຊື້ເປັນຂອງທີ່ລະນຶກ,
ຂອງຕ້ອນ, ຂອງຟາກ ແລະ ອື່ນໆ ເພື່ອສ້າງລາຍໄດ້ໃຫ້ຜູ້ປະກອບການ ແລະ ເປັນການສົ່ງເສີມການພັດທະນາສິນຄ້າພາຍໃນໃຫ້ຫຼາຍຂຶ້ນ
ແລະ ໂດດເດັ່ນ ຈຶ່ງໄດ້ກໍ່ຕັ້ງຮ້ານຫັດຖະ ກຳ ມູນພໍ່ຂຶ້ນມາໃນເດືອນ ກຸພາ ປີ
2012.
ຫັດຖະກຳມູນພໍ່ໄດ້ທຳການຜະລິດຕະພັນຫັດຖະກຳທີ່ມີຄຸນນະພາບ,
ນ້າຮັກ ແລະ ມີສີສັ່ນທີ່ສວຍງາມ ໂດຍການຄັດຈ້ອນເອົາແຜ່ນແຜ່ທີ່ມີຄຸນນະພາບ
ແລະ ໄດ້ມາດຕະຖານ ແລ້ວນຳມາປຸງແຕ່ງເປັນຜະລິດຕະພັນເສື້ອຢືດໂດຍການແຕ້ມລວດລາຍ
ແລະ ຂຽນໜັງສືເປັນພາສາລາວ ແລະ ພາສາຕ່າງປະເທດ ໃຫ້ເປັນແບບທີ່ສວຍງາມ ອອກມາເປັນສະໄຕຣ
ແລະ ເອກະລັກຂອງບ້ານເຮົາ. ສ່ວນການອອກແບບເຄື່ອງນຸ່ງໃຫ້ມັນສວຍງາມນັ້ນ ຂ້າພະເຈົ້າເອງແມ່ນໄດ້ອອກແບບໂດຍທີ່ມີຈິດໃຈມັກຮັກແທ້ໆໃນດ້ານນີ້ທີ່ເປັນລາຍແບບລາວເຮົາ
ມາແຕ່ດັ່ງເດີມ ແລ້ວນຳມາປັ້ນແຕ່ງທີ່ອອກມາເປັນແນວສະໄໝໃໝ່ແດ່ ທີ່ໄວລຸ້ນນິຍົມກັນຫຼາຍໃນຍຸກປັດຈຸບັນນີ້
ພວກເຮົາຍັງເກັບຮັກສາລວດລາຍທີ່ສະແດງເຖິງຄວາມເປັນລາວໄວ້ເປັນຢ່າງດີ.
ໃນປັດຈຸບັນຜະລິດຕະພັນຂອງ
ຫັດຖະກຳມູນພໍ່ ແມ່ນໄດ້ເນັ້ນຜະລິດເສື້ອຜ້າທີ່ເປັນປະເພດເສື້ອຢຶດທີ່ທັນສະໄໝ
ເຂົ້າກັບຍຸກປະຈຸບັນໄດ້ດີເໝາະສົມກັບຄົນທົ່ວໄປທັງຜູ້ໃຫຍ່ ແລະ ເດັກນ້ອຍ ພິເສດແລ້ວເໝາະສົມກັບບ່າວສາວທີ່ມັກການນຸ່ງເຄື່ອງເປັນຄູ່
ເພື່ອບຸ່ງບອກເຖິ່ງຄວາມຜູກພັນ, ຄວາມຮັກ ແລະ ຄວາມເປັນໝູ່ເພື່ອນທີ່ມີຄວາມຮູ້ສຶກດີໆໃຫ້ກັນ
ແລະ ກັນ.
ຈຸດພິເສດທີ່ເຮັດໃຫ້ຜະລິດຕະພັນຂອງພວກເຮົາແຕກຕ່າງຈາກຜະລິດຕະພັນຂອງຮ້ານອື່ນໆ
ພວກເຮົາໄດ້ນຳໃຊ້ແຜ່ນແຜ່ທີ່ມີຄຸນນະພາບ, ລວດລາຍກໍ່ແຕກຕ່າງກັນ ແລະ ສິນຄ້າກໍ່ເປັນທີ່ຍ້ອມຮັບຈາກສັງຄົມ
ອອກແບບໄດ້ສວຍງາມ, ບໍ່ກອບປີຂອງໃຜ ຜະລິດຕະພັນທຸກຢ່າງຢູ່ພາຍໃນຮ້ານແມ່ນໄດ້ອອກແບບອອກເອງໝົດ
ແລະ ຄິດຄົ້ນຫາການອອກແບບໃໝ່ຕະຫຼອດ ເພື່ອໃຫ້ທັນຍຸກທັນສະໄໝເຂົ້າກັບສັງຄົມລາວ
ແລະ ໃຫ້ທັນກັບຄວາມຕ້ອງການຂອງລູກຄ້າ.
ສຳລັບລູກຄ້າສ່ວນຫຼາຍທີ່ມາຊົມໃຊ້ຜະລິດຕະພັນແມ່ນຄົນລາວທີ່ຢູ່ໃນນະຄອນຫຼວງວຽງຈັນ
ແລະ ຕ່າງແຂວງ, ກໍ່ມີອີກຈຳນວນໜຶ່ງທີ່ເປັນຊາວຕ່າງປະເທດທີ່ຊື້ຜະລິດຕະພັນເຮົາສ່ວນໃຫຍ່ແມ່ນຄົນອາຊີທີ່ມັກຊື້ຫຼາຍ
ໃນການບໍລິການຍັງເປັນທີ່ຮູ້ຈັກກັນໜ້ອຍຢູ່ ເນື່ອງມາຈາຜະລິດຕະພັນຫາກໍ່ເປິີດໃຊ້ບໍລິການມາໄດ້ປີປາຍ
ຍັງບໍລິການບໍ່ທັນທົ່ວເຖິງເທື່ອ ແລະ ສິນຄ້າແມ່ນມີຈຳນວນຈຳກັດ.
ທ່ານ
ສຸວັນນີກ່າວຕື່ມວ່າ: ທຳອິດກໍ່ມີບັນຫາດ້ານຄຸນນະພາບຂອງສິນຄ້າ ແລະ ຄຳຕຳນິຈາກລູກຄ້າຈຳນວນ
ໜຶ່ງ, ບາງທີ່ກໍ່ອາດຈະບໍ່ແມ່ນສິນຄ້າຂອງພວກເຮົາ ບາງເອີນໄດ້ຍິນລູກຄ້າຈົ່ມວ່າຜະລິດຕະພັນລາວບໍ່ໄດ້ຄຸນນະພາບ
ຍ້ອນວ່າຄົນລາວຜະລິດ ຂ້າພະເຈົ້າກໍ່ກັງວົງຫຼາຍກັບບັນຫາແບບນີ້ ກ່ອນທີ່ຂ້າພະເຈົ້າຈະຜະລິດສິນຄ້າໜຶ່ງໆອອກມາ
ແມ່ນຕ້ອງໄດ້ທົດລອງຫົ່ມເອງຫຼາຍຕໍ່ຄັ້ງກ່ອນທີ່ຈະວາງຂາຍໄດ້ ພິເສດແລ້ວແມ່ນຈະໃສ່ໃຈດ້ານຄຸນນະພາບເປັນຫຼັກ
ແລະ ສິນຄ້າແຕ່ລະຢ່າງຕ້ອງໄດ້ມາດຕະຖານ ກໍ່ຍ້ອນແຮງກະຕຸ້ນນັ້ນເອງວ່າສິນຄ້າລາວບໍ່ດີ
ທີ່ເຮັດໃຫ້ຂ້າພະເຈົ້າຕັ້ງໃຈຜະລິດ ຕ້ອງໄດ້ຄຸນນະພາບ ແລະ ດີກວ່າສິນຄ້ານຳເຂົ້າອີກ.
ຂ້າພະເຈົ້າກໍ່ໄດ້ປັບປຸງມາເລື່ອຍໆຈົນເຮັດໃຫ້ຜະລິດຕະພັນໄດ້ຄຸນນະພາບ ແລະ
ເປັນທີ່ຮູ້ຈັກກັນດີໃນສັງຄົມລາວໃນປັດຈຸບັນ ເຮັດໃຫ້ຄົນລາວຫັນມາຊົມໃຊ້ຜະລິດຕະພັນພາຍໃນຫຼາຍຂຶ້ນ.
ການບໍລິການຂອງພວກເຮົາແມ່ນຈະໄດ້ຂາຍຢູ່ພາຍໃນຮ້ານ
ທີ່ພວກເຮົາວາງຂາຍນັ້ນມີຢູ່ສອງຈຸດຄື: ຈຸດທີ່ໜຶ່ງ ແມ່ນຂາຍຢູ່ບ້ານທົ່ງຕຸ່ມ
ແລະ ຈຸດທີ່ສອງແມ່ນຂາຍຢູ່ຕະຫຼາດມຶດແຄມຂອງສວນເຈົ້າອານຸວົງ ແລະ ການຕອບສະໜອງຂອງສິນຄ້າຄຸນນະພາບຕ້ອງມາກ່ອນສະເໝີ
ສິນຄ້າແຕ່ລະຢ່າງຕ້ອງມີຄຸນນະພາບ ລາຄາກໍ່ສົມເຫດສົມຜົນ (ລາຄາບໍ່ແພງ)ໃຫ້ສົມກັບຄຳວ່າ
“ອອກແບບໃຫ້ທັນສະໄໝ ໃສ່ໃຈລູກຄ້າ” ນັ້ນຄືເປົ້າໝາຍຂອງພວກເຮົາ.
ຕໍ່ກັບຄູ່ແຂ່ງທີ່ເຮັດທຸລະກິດທາງດ້ານນີ້ສຳລັບພວກເຮົາແລ້ວຄິດວ່າໜ້າຈະບໍ່ມີບັນຫາຫຍັງ
ເພາະວ່າທຸລະກິດນີ້ ພວກເຮົາໄດ້ອອກແບບທີ່ແຕກຕ່າງຈາກຮ້ານອື່ນໆທີ່ເຂົາເຈົ້າໄດ້ເຮັດມາກ່ອນ
ແລະ ຈະອອກແບບໃໝ່ຕະຫຼອດ ພິເສດແລ້ວຈະຕ້ອງອອກລວດລາຍບ້ານເຮົາ ຜ່ານມາການອອກແບບເສື້ອເຊີດແມ່ນຈະໄດ້ອີງໃສ່ເທດສະການຕ່າງໆເຊັ່ນ:
ບຸນທາດຫຼວງທີ່ຜ່ານມານີ້ພວກເຮົາກໍ່ໄດ້ອອກແບບປະມານ 10 ກວ່າແບບເພື່ອວາງຂາຍໃນບຸນພະທາດຫຼວງ
ເມື່ອໄດ້ວາງຂາຍພາຍໃນງານບຸນແລ້ວ ສິນຄ້າຂອງພວກເຮົາບໍ່ສາມາດຕອບສະໜອງໃຫ້ທົ່ວເຖິງໄດ້
ເພາະວ່າຈຳນວນສິນຄ້າມີຈຳກັດ, ສິນຄ້າປະມານ 3.000 ໂຕ ແມ່ນໄດ້ຂາຍໝົດທຸກຢ່າງ
ແລະ ຕໍ່ມາເທດສະການຕ່າງໆກໍ່ເຊັ່ນດຽວກັນ ແມ່ນໄດ້ຂາຍດີ. ນອກຈາກນັ້ນແລ້ວທາງຮ້ານຂອງພວກເຮົາຍັງໄດ້ບໍລິການ
ໂອນເງິນ ແລະ ແລກປ່ຽນເງິນຕາຕ່າງປະເທດນຳອີກ.
ແຜນການໃນຕໍ່ໜ້າພວກເຮົາຍັງຈະຮັກສາຄຸນນະພາບໄວ້ຄືເກົ່າ
ແລະ ພັດທະນາສິນຄ້າໃຫ້ໄດ້ມາດຕະຖານຂຶ້ນໄປເລື່ອຍໆ, ອີກດ້ານໜຶ່ງແມ່ນຈະໄດ້ຂະຫຍາຍສິນຄ້າໄປຕ່າງແຂວງໃຫ້ມັນທົ່ວປະເທດ.
ຜ່ານການເຮັດທຸລະກິດມາໄດ້ໄລຍະໜຶ່ງ
ຂ້າພະເຈົ້າກໍ່ມີຄວາມເພິ່ງພໍໃຈຫຼາຍ ທີ່ໄດ້ສ້າງຜະລິດຕະພັນນີ້ຂຶ້ນມາ ເພື່ອສົ່ງເສີ່ມຜະລິດຕະພັນລາວໃຫ້ໄດ້ມາດຕະຖານ
ແລະ ເປັນທີ່ຮູ້ຈັກຈາກສັງຄົມ ທີ່ນິຍົມກັນຊົມໃຊ້ຜະລິດຕະພັນ ທີ່ເປັນສີມືຂອງຄົນລາວແທ້ໆ.
ຕອນທ້າຍ
ທ່ານ ສຸວັນນີເຈົ້າຂອງຮ້ານຍັງຝາກເຖິງລູກຄ້າທີ່ມາໃຊ້ບໍລິການຜະລິດຕະພັນ
ແລະ ໄດ້ເຊີນຊວນ ໃຫ້ເຂົ້າມາເບິ່ງຜະລິດຕະພັນ ຢາກໃຫ້ຄົນລາວມານຳໃຊ້ສິນຄ້າທີ່ເປັນສີໄມ້ລາຍມືຂອງຄົນລາວ
ເພື່ອສົ່ງເສີ່ມ ຜະລິດຕະພັນລາວ ໃຫ້ຄົງຢູ່ຄູ່ກັບສັງຄົມລາວຕະຫຼອດໄປ. ປະຈຸບັນນີ້ພວກເຮົາກຳລັງກະກຽມໃສ່ບຸນປີໃໝ່ລາວ
ແລະ ອອກແບບໄວ້ແລ້ວເກື້ອບ 10 ລາຍການ ເພື່ອຮອງຮັບການຕອບສະໜອງໃຫ້ພຽງພໍກັບຄວາມຕ້ອງການຈາກລູກຄ້າ
ແລະ ສາມາດມາຈັບຈອງສິນຄ້າຂອງພວກເຮົາໄປເປັນເຈົ້າຂອງໄດ້ແລ້ວ ຫຼື ເຂົ້າມາຢ້ຽມຊົມທາງ
facebook ‘Nylao t-shirt’ ກ່ອນກໍ່ໄດ້.
ສະຖານທີ່ຕັ້ງຢູ່ບ້ານທົ່ງຕຸ່ມ ເມືອງຈັນທະບູລີ ນະຄອງຫຼວງວຽງຈັນ
ຢູ່ໃກ້ກັບໄຟແດງໂຮງກາຍະສິນ ລົງມາທາງໄຟແດງທົ່ງຂັ່ນຄຳ ເປີດບໍລິການແຕ່
7:00 – 17:00 ແລະ ອີກບ່ອນໜຶ່ງແມ່ນວາງຂາຍຢູ່ແຄມຂອງສວນເຈົ້າອານຸວົງ
ເປີດບໍລິການຕັ້ງແຕ່ 17:00 – 23:00
ທຸກໆມື້
ไม่มีความคิดเห็น:
แสดงความคิดเห็น